45 Movie Review

Summary (ಲೇಖನದ ಸಾರಾಂಶ)

• ಅರ್ಜುನ್ ಜನ್ಯ ನಿರ್ದೇಶನದ ಚೊಚ್ಚಲ ಸಿನಿಮಾ ’45’ ಫ್ಯಾಂಟಸಿ, ಆಕ್ಷನ್ ಹಾಗೂ ಫಿಲಾಸಫಿಯ ಅದ್ಭುತ ಸಂಯೋಜನೆಯಾಗಿದ್ದು, ಪ್ರೇಕ್ಷಕರಿಗೆ ಹೊಸ ಲೋಕವನ್ನು ಪರಿಚಯಿಸುತ್ತದೆ.

• ನಾನಾವತಾರಗಳಲ್ಲಿ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಮತ್ತು ವಿಭಿನ್ನ ಗೆಟಪ್‌ನಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ಅಬ್ಬರಿಸಿದ್ದು, ಅಭಿಮಾನಿಗಳಿಗೆ ಇದು ಹಬ್ಬದ ಊಟ.

• ಸಾವಿನ ಭಯದಲ್ಲಿ ಒದ್ದಾಡುವ ಯುವಕನಾಗಿ ರಾಜ್ ಬಿ ಶೆಟ್ಟಿ ನಟನೆ, ಅತ್ಯುತ್ತಮ ಮೇಕಿಂಗ್ ಹಾಗೂ ಗ್ರಾಫಿಕ್ಸ್ (VFX) ಪ್ರೇಕ್ಷಕರನ್ನು ಸೀಟಿನ ತುದಿಯಲ್ಲಿ ಕೂರಿಸುತ್ತದೆ.

45 Movie Review: ಬೆಳ್ಳಿಪರದೆಯ ಮೇಲೆ ಅರ್ಜುನ್ ಜನ್ಯ ಮ್ಯಾಜಿಕ್! ಶಿವಣ್ಣ-ಉಪ್ಪಿ ಆಟಕ್ಕೆ ಪ್ರೇಕ್ಷಕರು ಫಿದಾ

ಕಣ್ಣಿಗೆ ಬಿದ್ದ ಕೆಟ್ಟ ಕನಸುಗಳು ದಿಢೀರನೆ ನಿಜವಾದರೆ ಮನುಷ್ಯನ ಗತಿ ಏನಾಗಬೇಕು? ಸಾವಿನ ಭಯ ಕಾಡಿದಾಗ ಆತ್ಮದ ಪರದಾಟ ಹೇಗಿರುತ್ತದೆ? ಇಂತಹ ಗಂಭೀರ ಪ್ರಶ್ನೆಗಳಿಗೆ ಆಕ್ಷನ್ ಮತ್ತು ಫ್ಯಾಂಟಸಿಯ ಭರ್ಜರಿ ಒಗ್ಗರಣೆ ಹಾಕಿ ಬಹುನಿರೀಕ್ಷಿತ 45 ಚಿತ್ರವನ್ನು ಕಟ್ಟಿಕೊಡಲಾಗಿದೆ. ಗರುಡ ಪುರಾಣದ ಪಾಪ-ಪುಣ್ಯಗಳ ಲೆಕ್ಕಾಚಾರವನ್ನು ಬೆಳ್ಳಿಪರದೆಯ ಮೇಲೆ ಅದ್ಭುತವಾಗಿ ತರುವಲ್ಲಿ ನಿರ್ದೇಶಕರು ಯಶಸ್ವಿಯಾಗಿದ್ದಾರೆ.

ಮಲ್ಟಿ ಸ್ಟಾರರ್ ಸಿನಿಮಾ ಎಂದ ಕೂಡಲೇ ಅಭಿಮಾನಿಗಳಲ್ಲಿ ನಿರೀಕ್ಷೆ ದುಪ್ಪಟ್ಟಾಗುತ್ತದೆ. ಅದರಲ್ಲೂ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್, ರಿಯಲ್ ಸ್ಟಾರ್ ಉಪೇಂದ್ರ ಹಾಗೂ ರಾಜ್ ಬಿ ಶೆಟ್ಟಿ ಒಟ್ಟಾಗಿ ಬಂದರೆ ಕೇಳಬೇಕೆ? ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ ತಮ್ಮ ಚೊಚ್ಚಲ ನಿರ್ದೇಶನದಲ್ಲೇ ಯಾರಿಗೂ ನಿರಾಸೆಯಾಗದಂತೆ ಮೂವರೂ ನಟರಿಗೆ ಸಮಾನವಾದ ಸ್ಕ್ರೀನ್ ಸ್ಪೇಸ್ ನೀಡಿ ಭೇಷ್ ಎನಿಸಿಕೊಂಡಿದ್ದಾರೆ.

ಸಾಫ್ಟ್‌ವೇರ್ ಉದ್ಯೋಗಿ ವಿನಯ್ ಪಾತ್ರದಲ್ಲಿ ರಾಜ್ ಬಿ ಶೆಟ್ಟಿ ನೈಜ ನಟನೆಯ ಮೂಲಕ ಗಮನ ಸೆಳೆಯುತ್ತಾರೆ. ಅಪಘಾತವೊಂದರ ನಂತರ ಅವರಿಗೆ ಎದುರಾಗುವ ರಾಯಪ್ಪನಾಗಿ ಉಪೇಂದ್ರ ಮಿಂಚಿದ್ದಾರೆ. ಇತ್ತ ವಿನಯ್ ನೆರವಿಗೆ ಬರುವ ಶಿವಪ್ಪನಾಗಿ ಶಿವಣ್ಣ ಎಂಟ್ರಿ ಕೊಡುತ್ತಾರೆ. ಈ ಇಡೀ ಕಥೆ ನಡೆಯುತ್ತಿರುವುದು ಕನಸಿನಲ್ಲೋ ಅಥವಾ ನಿಜ ಜೀವನದಲ್ಲೋ ಎಂಬ ರೋಚಕ ಪ್ರಶ್ನೆ ಕ್ಲೈಮ್ಯಾಕ್ಸ್ ವರೆಗೂ ಪ್ರೇಕ್ಷಕರನ್ನು ಕಾಡುತ್ತದೆ.

ಈ ಚಿತ್ರದಲ್ಲಿ ಶಿವರಾಜ್‌ಕುಮಾರ್ ಅವರಿಗೆ ‘ಮಾಸ್ ಗಾಡ್’ ಎಂಬ ಬಿರುದು ನೀಡಲಾಗಿದ್ದು, ನಾನಾವತಾರಗಳಲ್ಲಿ ದರ್ಶನ ನೀಡಿ ಚಿತ್ರಮಂದಿರದಲ್ಲಿ ಸಿಳ್ಳೆ, ಚಪ್ಪಾಳೆ ಗಿಟ್ಟಿಸಿಕೊಳ್ಳುತ್ತಾರೆ. ಇತ್ತ ಉಪೇಂದ್ರ ಅವರ ವಿಭಿನ್ನ ಗೆಟಪ್, ಡೀಟೇಲಿಂಗ್, ಬೈಕ್ ಮತ್ತು ಮ್ಯಾನರಿಸಂ ಪಕ್ಕಾ ಮಾಸ್ ಆಗಿದೆ. ‘ಓಂ’, ‘ಪ್ರೀತ್ಸೆ’ ಮತ್ತು ‘ಲವ ಕುಶ’ ಚಿತ್ರಗಳ ನಂತರ ಇಬ್ಬರೂ ದಿಗ್ಗಜರನ್ನು ಮತ್ತೆ ಒಟ್ಟಿಗೆ ನೋಡುವ ಅವಕಾಶ ಕನ್ನಡಿಗರಿಗೆ 45 ಚಿತ್ರದ ಮೂಲಕ ಸಿಕ್ಕಿದೆ.

ಸಾವಿನ ಭಯದಲ್ಲಿ ನರಳುವ ಅಮಾಯಕನಾಗಿ ರಾಜ್ ಬಿ ಶೆಟ್ಟಿ ಒಮ್ಮೊಮ್ಮೆ ತಮ್ಮ ಹಳೆಯ ಹಿಟ್ ಚಿತ್ರಗಳನ್ನು ನೆನಪಿಸುತ್ತಾರೆ. ಸತ್ಯ ಹೆಗ್ಡೆ ಅವರ ಛಾಯಾಗ್ರಹಣ ಹಾಗೂ ಅರ್ಜುನ್ ಜನ್ಯ ಅವರ ಹಿನ್ನೆಲೆ ಸಂಗೀತ ಚಿತ್ರದ ಜೀವಾಳವಾಗಿದೆ. ತಡವಾದರೂ ವಿಎಫ್‌ಎಕ್ಸ್ (VFX) ಮತ್ತು ವಾರ್ ದೃಶ್ಯಗಳ ಗ್ರಾಫಿಕ್ಸ್ ಪ್ರೇಕ್ಷಕರಿಗೆ, ವಿಶೇಷವಾಗಿ ಶಿವಣ್ಣನ ಫ್ಯಾನ್ಸ್‌ಗೆ ಅಕ್ಷರಶಃ ರಸದೌತಣ ನೀಡುತ್ತವೆ.