ಪುನೀತ್ ಇಲ್ಲದೇ ‘ಆಕಾಶ್’ ಸಿನಿಮಾ ನೋಡೋಕೆ ಕಷ್ಟ ಆಗುತ್ತದೆ: ರಾಘಣ್ಣ ಭಾವುಕ

ಪುನೀತ್ ರಾಜ್‌ಕುಮಾರ್ ಮತ್ತು ರಮ್ಯಾ ದಿವ್ಯ ಸ್ಪಂದನಾ ಅಭಿನಯದ ‘ಆಕಾಶ್’ ಸಿನಿಮಾ ಮತ್ತೆ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದೆ. ಈ ವಿಶೇಷ ಸಂದರ್ಭದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ಅವರು ಇಂದು (ಮಾರ್ಚ್ 13) ಚಿತ್ರಮಂದಿರಕ್ಕೆ ಭೇಟಿ ನೀಡಿ ಸಿನಿಮಾ ವೀಕ್ಷಿಸಿದರು.

ಅಭಿಮಾನಿಗಳ ಜೊತೆಯೇ ಕುಳಿತು ಸಿನಿಮಾ ನೋಡಿದ ಅವರು, ಬಳಿಕ ಮಾಧ್ಯಮಗಳ ಜೊತೆ ಮಾತನಾಡಿದರು. ಈ ವೇಳೆ ಅಪ್ಪು ನೆನಪಿಗೆ ಬಂದು ಅವರು ಭಾವುಕರಾದರು.

“ಪುನೀತ್ ಇಲ್ಲದೇ ಈ ಸಿನಿಮಾ ನೋಡೋದು ತುಂಬಾ ಕಷ್ಟವಾಗಿದೆ. ಆ ಹಳೆಯ ದಿನಗಳು ಮತ್ತೆ ವಾಪಸ್ ಬರಬೇಕು ಅನ್ನಿಸುತ್ತದೆ,” ಎಂದು ಅವರು ಹೇಳಿದರು.

ಚಿತ್ರದ ಬಗ್ಗೆ ಮಾತನಾಡಿದ ಅವರು, “ಆಕಾಶ್ ಸಿನಿಮಾ ಈಗಲೂ ಅಷ್ಟೇ ಚೆನ್ನಾಗಿ ಕಾಣುತ್ತದೆ. ಪುನೀತ್ ಮತ್ತು ರಮ್ಯಾ ಜೋಡಿ ತುಂಬಾ ಚೆನ್ನಾಗಿದೆ. ಅಭಿಮಾನಿಗಳು ಕೂಡ ಅದೇ ಪ್ರೀತಿಯಿಂದ ಮತ್ತೆ ಚಿತ್ರಮಂದಿರಕ್ಕೆ ಬಂದು ಸಿನಿಮಾ ನೋಡುತ್ತಿರುವುದು ಸಂತೋಷ ತಂದಿದೆ,” ಎಂದರು.

ಇನ್ನೂ ಮುಂದುವರೆದು, “ಅಭಿಮಾನಿಗಳ ಈ ಪ್ರೀತಿ ನೋಡಿದಾಗ ಪುನೀತ್ ನಮ್ಮ ಜೊತೆ ಇಲ್ಲ ಅನ್ನೋ ಭಾವನೆ ಕಡಿಮೆಯಾಗುತ್ತದೆ,” ಎಂದು ರಾಘವೇಂದ್ರ ರಾಜ್‌ಕುಮಾರ್ ಮನದಾಳದ ಮಾತು ಹಂಚಿಕೊಂಡರು.

‘ಆಕಾಶ್’ ಸಿನಿಮಾ ಮರು ಬಿಡುಗಡೆಯ ಮೂಲಕ ಮತ್ತೆ ಅಪ್ಪು ನೆನಪುಗಳು ಅಭಿಮಾನಿಗಳ ಮನದಲ್ಲಿ ಜೀವಂತವಾಗಿವೆ.